GAUTENG. – Twee verdagtes is in hegtenis geneem nadat Ditebogo Phalane (5) Vrydagaand in Soshanguve doodgeskiet is.
Die polisie sê die voertuig wat tydens die misdaad gebruik is, is gekonfiskeer.
‘n Voertuigopsporingstoestel, ‘n vuurwapen en ‘n gesteelde voertuig is glo in die verdagtes se besit gevind.
Nuusflits se Zelda Mans het voorheen soos volg berig:
PRETORIA, SUID-AFRIKA. – Ditebogo Phalane (5) is Vrydagaand doodgeskiet in ’n beweerde kaping in die Sosanguve-woonbuurt in Pretoria.
Volgens lt. kol. Mavela Masondo het die voorval omstreeks 22:00 Vrydagaand plaasgevind toe ’n pa by sy huis met ’n wit Toyota-bakkie aangekom het. Sy seuntjie het uit die huis gehardloop om hom te verwelkom.
’n Onbekende aantal gewapende verdagtes het na bewering die bakkie gekaap en die seun geskiet.
Volgens Masondo is die seun na ’n hospitaal gehaas. Met sy aankoms by die hospitaal is hy dood verklaar.
Gayton McKenzie van die Patriotic Alliance het R250 000 as beloning aangekondig vir enigiemand wat kan help met inligting wat tot die inhegtenisname van die verdagtes kan lei.
’n Saak van moord en kaping is geopen. Die SAPD doen ’n beroep op enigeen wat inligting rakende die voorval het om hulle naaste polisiestasie of 08600 10111 te kontak.
Bron: SAPD, X
