NOORD-KAAP. – ‘n Vlieënier en twee passasiers van ‘n Alouette-helikopter met registrasienommer ZU-RAL het Sondag omstreeks 12:00 gesterf toe dit naby Daniëlskuil neergestort het.
Sisa Majola, burgerlugvaartowerheid-woordvoerder, sê in ‘n verklaring die helikopter was op pad van Elandsvlakte na Olifantshoek toe dit in die Kurumanheuwels in Daniëlskuil neergestort het. Die impak het beduidende skade aan die helikopter veroorsaak en ’n brand ná die ongeluk het dit geheel en al vernietig.
“Ondersoekbeamptes is na die toneel gestuur en ’n voorlopige verslag sal binne 30 dae ná die ongeluk op die SACAA-webtuiste gepubliseer word,” sê Majola. Burgerlugvaart het sy medelye aan die families en vriende van die oorledenes betuig.
Kol. Cherelle Ehlers, polisiewoordevoerder, sê in ‘n verklaring die helikopterongeluk waartydens die drie mans, tussen 23 en 34 jaar, omstreeks 12:00 tussen Daniëlskuil en Kuruman gesterf het, word deur die Daniëlskuil-polisie ondersoek. Die polisie het geregtelike doodsondersoekdossiere geopen.
Die oorledenes is deur Duncan Gillespie op sosiale media as Anlo Ferreira, dr. Alwyn Venter en Anglo Robbertse, geïdentifiseer.
