OOS-KAAP. – Drie persone is Donderdagmiddag omstreeks 12:00 in Khozistraat in NU3 in Motherwell, Gqeberha, doodgeskiet.
Lt.kol. Siphokazi Mawisa sê ‘n soektog is geloods om die verdagtes op te spoor. Volgens inligting het gewapende verdagtes verskeie skote in die straat geskiet. Drie persone is aan hulle skietwonde dood.
Die motief vir die skietery en die omstandighede daarvan is deel van die ondersoek.
Enigiemand met inligting word gevra om speur.kapt. Monde Sithole by 082 457 2812 te bel.
Lt.genl. Nomthetheleli Mene het die moorde veroordeel: “Ons wil ons afsku uitspreek vir sulke blatante en roekelose minagting van menselewens. Ons toegewyde ondersoekers is tans op die grond en gebruik alle beskikbare hulpbronne en intelligensie om diegene wat verantwoordelik is te identifiseer en vas te trek.”
