MPUMALANGA. – Drie mense is Saterdagaand dood toe ’n Volkswagen Polo op die N4-tolpad tussen Karino en die Valencia-wisselaar buite Mbombela (Nelspruit), agter in ’n ligte afleweringsvoertuig vasgery het. Die oorledenes, twee mans en ’n vrou, is uit die voertuig geslinger toe dit omgeslaan het.
Moeti Mmusi, woordvoerder vir die departement van gemeenskapsveiligheid, sekuriteit en skakeling, sê in ‘n verklaring die sedan het ná die botsing omgeslaan. Twee insittendes van die sedan is ernstig beseer, terwyl geen beserings in die bakkie aangemeld is nie. Paramedici het die beseerdes gestabiliseer voordat hulle na mediese fasiliteite in Mbombela vervoer is.
Die oorsaak van die ongeluk is nog onbekend. Drie aanklagte van strafbare manslag word tans ondersoek.
