GAUTENG. – Drie verdagtes is in Chrisville, in Booysens, suidwes van Johannesburg, tydens ‘n skietery met ‘n multi-dissiplinêre span doodgeskiet. Nog drie verdagtes is in hegtenis geneem.
Kol. Katlego Mogale sê inligting is ontvang van verdagtes wat glo voorstede van Johannesburg met gewelddadige misdade terroriseer. Die beweerde misdade sluit 30 moorde in. ‘n Operasie is deur verskeie wetstoepassingsagentskappe geloods.
Met aankoms op die perseel het ‘n skietgeveg uitgebreek, waartydens drie verdagtes noodlottig gewond en nog drie in hegtenis geneem is.
Mogale sê twee ongelisensieerde vuurwapens is op die toneel gevind.
Die moontlikheid van meer inhegtenisnemings en verdagtes wat aan meer misdade gekoppel word, word nie uitgesluit nie.
