VRYSTAAT. – Tydens ‘n interprovinsiale misdaadvoorkomingsoperasie is ‘n groot deurbraak gemaak toe ‘n besending crystal meth van 313.5 kg met ‘n geskatte straatwaarde van R50 m. onderskep is.
Kapt. Loraine Earle sê polisielede van die Vrystaat, Wes-Kaap, Oos-Kaap en Noord-Kaap het die sukses met ‘n operasie binne 24 uur sedert dit geloods is, behaal. Omstreeks 10:30 op 25 Maart het Aliwal Noord-speurders en misdaadintelligensie inligting van ‘n vragmotor, vermoedelik met dwelms, onderweg van Smithfield na Aliwal-Noord ontvang. Earle sê die vragmotor is op ‘n brug onderskep en die dorp in begelei om ondersoek te word. Die plaaslike kriminele rekordsentrum en honde-eenheid is ontbied. Tydens ‘n deursoeking van die vragmotor is 12 groot sakke crystal meth ontdek. Die dwelms en vragmotor is gekonfiskeer.
Die bestuurder en eienaar (35) van die vragmotor, van Gauteng, is gearresteer en sal binnekort in die Aliwal Noord-landdroshof verskyn.
