KWAZULU-NATAL. – Een persoon het gesterf toe ‘n voertuig met drie insittendes op die M13 naby die Engen Polo Pony-vulstasie in Shongweni, wes van Durban in ‘n rivier beland het.
Garrith Jamieson van ALS Paramedics sê die diens het verskeie oproepe van motoriste wat hulp vra, gekry. Met aankoms op die toneel was die metropolisie reeds teenwoordig. Die voertuig het die pad verlaat en teen ‘n brug gebots, waarna dit meters na benede in ‘n rivier geval het. ‘n Alternatiewe roete is gebruik om toegang tot die voertuig te verkry. ‘n Manlike passasier, vermoedelik in sy 20’s, is op die toneel dood verklaar. Die oorledene se liggaam is met behulp van gespesialiseerde toerusting uit die wrak bevry.
Die twee ander insittendes is op die toneel gestabiliseer en na ‘n nabygeleë hospitaal vir verdere mediese behandeling geneem.
Jamieson sê owerhede was op die toneel en die ongeluk word ondersoek.
