BELLVILLE, WES-KAAP. – ’n Foto van ’n Kaapstad-inwoner wat ’n geleentheid gesien en dit benut het, doen weer die rondte. Isaac Mpofu het in 2021 stoele aan mense uitverhuur wat in lang toue by Bellville se kantoor vir binnelandse sake staan en wag het. Die foto word gedeel om werkloses aan te moedig om kreatief te begin dink.
Mpofu het hom tot die verhuring gewend in ’n poging om sy destydse studieskuld af te betaal. Hy het ’n BCom-graad in Finansiële Rekeningkunde aan die Universiteit van Wes-Kaapland behaal.
Volgens Nhlanhla Simelane se Facebook-blad waarop die foto weer gedeel is, het Mpofu R10 per stoel gevra. Hy maak dan die somme dat dit moontlik is om tot R30 000 per maand op só ’n manier te verdien indien daar ’n minimum van 150 besoekers daagliks is.
Mpfofu was goed ingerig met ’n trollie waarop die stoele op mekaar gestapel is.
Facebook-gebruikers is van mening dat dit ’n bewys is van sogenaamde swak dienslewering omdat binnelandse sake volgens hulle eintlik aan besoekers sitplek moet verskaf. Ander stem saam dat dit ’n goeie manier is om vir jouself te werk.
Dit is onbekend waar Mpofu homself deesdae bevind.
Bron: Nhlanhla Simelane Facebook, My Broadband
