MELBOURNE, AUSTRALIË. – ’n Vrou het onlangs na ’n ontbytprogram in Melbourne ingebel en gebieg dat sy en haar familie al van haar oorlede ouma se as geëet het.
Die vrou genaamd Cheynee is deur die aanbieders van die program gevra of sy enigiets het om tydens hulle Cashfessional-program te bely.
Sy het voortgegaan en vertel haar ouma is in Augustus 2023 oorlede en dat sy veras is. Volgens haar het hulle een aand na haar ma se huis gegaan om haar op te vrolik toe hulle besluit om van die ouma se as te proe.
Hulle het bloot net van die ouma se as in ’n bak gegooi en dit geëet. Sy het haar ma ook uiteindelik oorreed om daarvan te eet.
Die vreemdste gedeelte van die belydenis vir die aanbieders was toe sy vertel hoe sy skelm van die as vir haar broer ook gegee het. Sy het haar ouma se as in pastasous gegooi. Haar broer het onwetend heerlik daaraan gesmul.
Volgens Cheynee peusel sy steeds aan haar ouma se as, aangesien dit haar nader aan haar laat voel. Sy glo dat haar ouma nou vir ewig deur haar sal voortleef.
Bronne: LadBible, The Mirror, Daily Mail
