In die 10de episode van die reeks Op my eish! het geheime uitgelek en die vroue se kennis oor Brendan Peyper is getoets.
Rachelle wen ’n kompetisie waarin die vroue vrae oor Brendan moes beantwoord. Die vrae het sy rugbyposisie en hond se naam ingesluit. Brendan se kennis oor die meisies word ook getoets en hy brand vas met vrae oor Chaunte en Janae.
Brendan en die vroue gaan na ’n spa waar almal saam in ’n jacuzzi beland. Hy spandeer alleentyd saam met Rachelle. Hy stel haar gerus dat sy nie teen die ander vroue hoef te kompeteer nie, omdat hy haar “raaksien”.
Jonelle bieg dat sy bang is om weer seer te kry in ’n verhouding. Katja gebruik haar kans en vra later vir Brendan of sy hom mag soen.
Chaunte se klikkery oor Janae, wat beplan om op seiljagte te gaan werk, is beslis die hoogtepunt van die episode. Brendan wil weet wie die vrou is, en Janae kom met die waarheid uit. Sy verseker hom dat dit nie ’n definitiewe reëling is nie en sy sal die opsie heroorweeg indien hulle verhouding uitwerk.
In die volgende episode maak die vyf vroue met die media kennis.
Bronne: kykNET, Terloops
