GAUTENG. – ‘n Gekaapte sleepwa, met goedere ter waarde van R600 000, is omstreeks 09:00 op Kersdag deur EMPD-Bronberg in die Petit-gebied teruggevind.
Ekhurhuleni-metropolisie sê beamptes van dié departement was besig met roetinepligte toe hullle ‘n sleepwa aan die kant van Pretoriapad opmerk. Met ondersoek is bevind die sleepwa met ‘n vraghouer is in die Durban-hawe gekaap.
Die sleepwa het geen registrasienommer of ‘n lisensieskyfie gehad nie, maar die eienaar kon bevestig die vrag is aluminium. Die nodige rolspelers is gekontak, waarna die sleepwa met sy vrag na veiligheid gesleep is.
