Die Afrikaanse sanger Gerhard Steyn het sy nuwe enkelsnit, Vra Net Vir Jou, bekendgestel. Die liefdeslied is geïnspireer deur sy eie verhouding met sy vrou en handel oor die ontdekking van ware liefde.
Fanie Nel van die Coleske Groep sê die lied behou die romantiese styl waarvoor Steyn bekend is, maar voeg ook ‘n meer moderne en energieke klank by.
Volgens Steyn is die lied gebore uit sy eie ervaring nadat hy vir lank geweet het sy vrou is sy lewensmaat, al het hulle aanvanklik nooit uitgegaan nie. Hy sê die boodskap van die lied is dat ‘n mens nie moet wegstap wanneer die regte persoon oor jou pad kom nie. Steyn hoop luisteraars sal hul eie liefdesverhale in die lirieke herken en daarby aanklank vind.
Die musiekvideo, wat deur Coolerbox Brothers vervaardig is, beeld dié liefdesverhaal uit met Kate Roothman en Gerald Steyn, wat ook saam in Binnelanders te sien was, in die hoofrolle.
Steyn sê hy wil hê sy musiek moet mense vir ‘n rukkie van die alledaagse laat ontsnap en hulle goed laat voel, terwyl hulle met die liedjies kan vereenselwig.
Vra Net Vir Jou kan hier op alle stroomdienste gevind word.
