GAUTENG. – ’n Verdagte (40) wat vir die moord op Zwelabantu Zuma, die skoolhoof van Msinga, gesoek is, is Sondagmiddag in Soweto deur lede van die nasionale intervensie-eenheid (NIU) doodgeskiet.
Brig. Athlenda Mathe, polisiewoordvoerder, sê in ‘n verklaring die verdagte is aan verskeie sake – dit sluit kapings en die besit van ‘n onwettige vuurwapen in – in KwaZulu-Natal gekoppel. Hy is voorheen in hegtenis geneem, maar die saak is teruggetrek. Nuwe bewyse is egter voor die hof gebring, waarna ’n J50-lasbrief vir sy inhegtenisneming uitgereik is. Die NIU het die verdagte by ’n koshuis in Mapetla, Soweto, opgespoor. Toe hy die polisie opmerk, het hy begin skiet en die NIU het teruggeskiet, wat tot sy dood gelei het.
Twee van die beskuldigdes in Zuma se moordsaak is reeds tot lewenslange tronkstraf gevonnis, terwyl nog twee voor die verhoor gesterf het. Een verdagte word steeds gesoek.
Die soektog na die oorblywende verdagte duur voort.
