KWAZULU-NATAL. – ‘n Gesoekte verdagte (19) is Woensdagaand deur ‘n polisiebeampte in ‘n ongemerkte polisievoertuig ‘n saamrygeleentheid aangebied, waarna hy in hegtenis geneem is.
Kol. Robert Netshiunda sê ‘n wenk oor die verdagte is ontvang, wat van die moord op Khanya Mthembu (21) verdink word. Die polisielid het by ‘n vulstasie ingetrek en rugsteun gevra, waarna die verdagte deur die Richardsbaai-polisie gearresteer is.
Volgens inligting het die verdagte en oorledene op 8 September ‘n woordewisseling gehad. Die oorledene het die taverne waar hulle was verlaat en is glo deur die verdagte gevolg. Hy is langs ‘n sportveld in Mzingazi doodgesteek.
Die vedagte sal vandag in die Richardsbaai-landdroshof voorkom.
