KWAZULU-NATAL. – Twee mans, wat na bewering by verskeie gewelddadige misdade in Inanda en omliggende gebiede betrokke was, is vanoggend (Maandag) in Umlazi doodgeskiet nadat hulle op polisiebeamptes geskiet het.
Volgens kol. Robert Netshiunda, polisiewoordvoerder, het beamptes inligting oor die verdagtes se skuilplek ontvang. Met die polisie se aankoms in ’n informele nedersetting in D-afdeling, Silwane Khozaweg, het die verdagtes glo op hulle begin skiet, waarop die beamptes teruggeskiet het.
Twee vuurwapens is by die verdagtes wat gedood is, gevind. Die vuurwapens sal vir ballistiese toetse gestuur word om te bepaal of dit met ander misdade in KwaZulu-Natal verbind kan word.
