MPUMALANGA. – ‘n Verdagte (37) is Saterdag vasgetrek nadat hy glo passasiers in ‘n bus met ‘n vuurwapen gedreig en van hulle persoonlike items beroof het.
Kol. Donald Mdhluli sê grenspolisiëring het die inhegtenisneming gemaak.
Terwyl die buspassasiers beroof is, is die polisie in kennis gestel en hulle het dadelik reageer. Die bus is gestop en deursoek om die verdagte op te spoor. ‘n Passasier met ‘n vuurwapen sonder ammunisie is aangekeer. Die man is geïdentifiseer as die beweerde rower op die bus en hy is vir die onwettige besit van ‘n vuurwapen en vir roof in hegtenis geneem.
Die polisielede het beslag op die vuurwapen gelê wat vir ballistiese toetse gestuur sal word om vas te stel of dit al voorheen in ander misdade gebruik is.
Mdhluli sê nog aanklagte kan moontlik soos wat die ondersoek vorder, bygevoeg word.
