MPUMALANGA. – ‘n Deurbraak is gemaak in die saak van ‘n geweer wat ‘n paar weke gelede onverklaarbaar by Skukuza in die KNP verdwyn het. ‘n Veldwagter (37) van Skukuza is gearresteer.
Kol. Donald Mdhluli sê die polisie, in samewerking met SANParke, het die deurbraak gemaak nadat inligting bekom en ‘n operasie geloods is.
“Die operasie is ironies genoeg op Wêreldveldwagterdag uitgevoer.”
Mdhluli sê deur ondersoek en ondervraging is ‘n veldwagter as verdagte geïdentifiseer. Die vermiste geweer en ammunisie is in die plafon van ‘n huis in Hluvukani, naby Thulamahashe in die Bosbokrand-area, gevind.
“Daar word geglo die geweer wat gevind is, kan die een wees waarna wetstoepassingsagentskappe gesoek het.”
Die veldwagter is op aanklagte van die onwettige besit van ‘n vuurwapen en ammunisie in polisie-aanhouding. Byvoeging van meer klagtes kan nie uitgesluit word nie. Die veldwagter sal binnekort in die hof verskyn.
Mdhluli sê die geweer sal per standaard prosedure ballistiese toetsing by die polisie se forensiese wetenskaplaboratorium ondergaan om vas te stel of die wapen nie tydens ander misdade gebruik is nie.
