GAUTENG. – ‘n Gr. 2-leerling van Laerskool Thabisile in Diepkloof, Soweto, is dood nadat sy glo Woensdag 20 November koekies van ‘n plaaslike spazawinkel gekoop het.
Steve Mabona, woordvoerder vir die departement van onderwys, sê die 8-jarige meisie het volgens inligting siek geword. Haar gesondheid het verswak, waarna sy Vrydag na die Chris Hani Baragwanath Akademiese Hospitaal geneem is waar sy met aankoms dood verklaar is.
Mabona sê ondersoek word gedoen om die omstandighede en die oorsaak van haar dood vas te stel. Die departement ondersteun die familie, leerlinge en personeel van die skool met berading.
Chiloane Matome, LUR vir die departement, besoek vandag die skool en die oorledene se familie.
