NOORD-KAAP. – Die Kimberley-dierebeskermingsvereniging (DBV) het Maandag ‘n klagte van beweerde onwettige slag van twee honde in Jacksonville ondersoek. Die vleis is glo aan die gemeenskap verkoop.
Volgens die DBV het die man na bewering die honde wat aan ‘n familielid behoort, geslag. Die vleis is daarna valslik as varkvleis verkoop. ‘n Soektog het twee koppe, pote en vel van die honde opgelewer. Die DBV het bevestig die foto’s wat geneem is, is te grafies en ontstellend om te deel.
Die verdagte se naam en adres is bekend, maar hy kon nog nie opgespoor word nie. Volgens die DBV soek die polisie na die verdagte
Die familielid is ontsteld oor die verlies van die troeteldiere.
“Kimberley-DBV is diep ontsteld oor hierdie verskriklike voorval. Wanneer sal die lyding van diere in die hande van mense eindig? Ons sal nie rus totdat hierdie oortreder aangekla is nie.”
