GAUTENG. – Panyaza Lesufi, Gauteng-premier, het Lesiba Arnold Malotana, hoof van die Gautengse departement van gesondheid en welstand, met onmiddellike effek geskors. Dr. Darion Barclay is as waarnemende hoof van die departement aangestel.
In ‘n vrygestelde verklaring word daar gesê Barclay, wat tans die departement van samewerkende regering en tradisionele sake (CoGTA) lei, sal stabiliteit en kontinuïteit in die departement verseker.
Lesufi se kantoor het aangekondig dat alle prestasieooreenkomste van die lede van die uitvoerende raad Donderdag aan die publiek beskikbaar gestel sal word.
Die Gautengse provinsiale regering het intussen sy volle steun bevestig, vir die werk van die spesiale ondersoekeenheid (SOE) en ander wetstoepassingsagentskappe.
