GAUTENG. -‘n Chinese voortvlugtige wat internasionaal gesoek word, is hiedie week deur die Interpol Nasionale Sentrale Buro (NCB) in Pretoria, deel van die polisiediens, in Sandton in hegtenis geneem. Hy word glo aan ’n saak van bedrog in China gekoppel.
Lt.kol. Amanda van Wyk, nasionale polisiewoordvoerder, sê in ‘n verklaring volgens ’n voorlopige verslag het Interpol ’n rooi kennisgewing aan alle lidlande versprei, om die Chinese burger op te spoor en voorlopig in hegtenis te neem. Die verdagte het na bewering vir ’n visum by die Amerikaanse ambassade in Sandton aansoek gedoen, toe sy voortvlugtige status opduik en hy Dinsdag in hegtenis geneem is. Hy het Woensdag sy eerste verskyning in die Randburg-landdroshof gemaak.
“Voortvlugtiges probeer dikwels na ander lande vlug om arrestasie te ontduik,” het lt.kol. Amanda van Wyk gesê.
