INTERNASIONAAL. – Iran se president, Masoud Pezeshkian, het voorwaardes uiteengesit vir ’n moontlike einde aan die oorlog met die VSA en Israel, wat volgens ontleders op ’n moontlike versagting van Teheran se standpunt kan dui. Die oorlog tussen Iran, die VSA en Israel is reeds in sy 14de dag.
Volgens Al Jazeera het Pezeshkian Woensdag op die sosialemediaplatform X gesê hy het met sy eweknieë in Rusland en Pakistan gepraat en Iran se “toewyding tot vrede” bevestig.
“Die enigste manier om hierdie oorlog – wat deur die Sionistiese regime en die VSA ontketen is – te beëindig, is deur Iran se wettige regte te erken, skadevergoeding te betaal en sterk internasionale waarborge teen toekomstige aggressie te bied,” het hy geskryf.
Volgens ontleders is die verklaring opvallend omdat Teheran aanvanklik enige onderhandelinge of skietstilstand verwerp het toe die konflik twee weke gelede uitgebreek het.
Bronne: Al Jazeera, The Caspian Post
