Jetour het binne twee jaar ná sy Suid-Afrikaanse bekendstelling van ’n nuweling tot een van die land se tien motorhandelsmerke met die meeste verkope gegroei, volgens die Chinese motorvervaardiger.
Die handelsmerk het in September 2024 plaaslik sy toetrede gemaak met die vyfsitplek-Dashing en die sewesitplek-X70 Plus. Teen April 2025, sewe maande ná die bekendstelling, was Jetour volgens sy verkoopsyfers reeds onder Suid-Afrika se 15 topverkoper-motorhandelsmerke.
Jetour verkope styg met die T-reeks
Die toevoeging van die T1 en T2 in die laaste kwartaal van 2025 het verkope verder aangehelp. Jetour se maandelikse verkope het van 852 voertuie in Oktober tot 1 235 in November gestyg.
Die T2 het in November alleen 545 verkope aangeteken, hoewel dié model volgens Jetour net die helfte van die maand te koop was. Dit het 44,1% van die handelsmerk se verkope verteenwoordig en die T2 onmiddellik sy gewildste model gemaak.
In Desember het Jetour 1 371 voertuie verkoop en vir die eerste keer die plaaslike toptien gehaal. Nog ’n rekord het in Januarie 2026 gevolg toe 1 550 voertuie verkoop is. Die T-reeks het meer as 1 000 van dié verkope gelewer.
Nuwe modelle en Motor van die Jaar
Jetour het sy reeks in April vanjaar uitgebrei met die T1 i-DM en T2 i-DM, twee inprophibried-sportnutsvoertuie. Bygewerkte weergawes van die Dashing en X70 Plus het in Julie gevolg, met veranderings aan onder meer die voorkoms, kajuit, tegnologie en veiligheidskenmerke.
Volgens Jetour was die T2 se oorwinning in die Suid-Afrikaanse Motor van die Jaar-kompetisie in Mei ’n besondere hoogtepunt. Die maatskappy sê dit was die eerste keer in die kompetisie se 40-jarige geskiedenis dat ’n Chinese motorvervaardiger die algehele titel verower het.
Handelaarsnetwerk en naverkoopdiens
Naverkoopdiens is volgens die handelsmerk ’n belangrike deel van sy plaaslike strategie. Navorsing voor die bekendstelling het onderdelebeskikbaarheid en betroubare ondersteuning as verbruikers se belangrikste oorwegings uitgelig.
Jetour se aanvanklike netwerk van 40 handelaars het intussen tot meer as 55 gegroei. Die maatskappy bedryf ook ’n onderdeleverspreidingsentrum van 5 000 m² in Midrand.
Die handelsmerk het volgens die verklaring in Julie vir die tweede agtereenvolgende jaar goudstatus in die National Automobile Dealers’ Association (NADA) se handelaarsbevredigingsindeks behaal.
Shaun Steynberg, Jetour Suid-Afrika se bemarkingshoof, sê die maatskappy is trots op sy aanvanklike groei, maar besef dat verbruikersvertroue deurlopend verdien moet word.
“Ons is ook deeglik bewus daarvan dat ons voortdurend voertuie moet lewer wat mense wil bestuur en besit, gerugsteun deur die gehalte, waarde en naverkoopondersteuning wat hulle verwag,” sê hy.
Jetour bied ook eienaarsgeleenthede en ’n eienaarsklub as deel van sy Travel+-benadering aan.
