KWAZULU-NATAL. – ‘n Man, vermoedelik in sy 20’s, het Nuwejaarsmiddag gesterf toe sy motor in Shakaskraal 50 meter na benede van ‘n brug af op ‘n treinspoor beland het. Nog insittendes is beseer.
Samantha Meyrick van IPSS Medical Rescue sê dié diens se soek-en-reddingseenheid en Tongaat-tak het hulle na die toneel tussen die N2 en R102 gehaas. Buiten die oorledene het nog ses insittendes ernstige beserings opgedoen. Hulle is op die toneel gestabiliseer, waarna vier onder die sorg van gevorderde lewensondersteunende paramedici vir verdere mediese sorg na verskeie fasiliteite vervoer is.
Meyrick sê volgens omstanders het die bestuurder van die motor die toneel verlaat, maar dit is nie bevestig nie. Ondersoek sal ingestel word. Alle rolspelers, wat die brandweer, verkeer en polisie insluit, was op die toneel teenwoordig.
