WES-KAAP. – Speurders is tans in Saldanabaai om onlangse beweringe oor die moontlike ligging van Joshlin Smith te ondersoek. Die polisie sê daar is egter nog geen tasbare bewyse wat aan Joshlin gekoppel kan word nie, maar elke wenk wat ontvang word, word deeglik en ernstig ondersoek.
Kol. Andrè Traut sê sedert Joshlin se verdwyning het die polisie verskeie leidrade van die publiek nagegaan oor haar moontlike ligging en wat met haar gebeur het. Hoewel al die inligting vir geloofwaardigheid en bewyswaarde getoets is, het dit nog nie tot ’n deurbraak gelei nie. Die ondersoek bly intussen oop en aktief, selfs nadat drie beskuldigdes in Mei 2024 gevonnis is. Speurders hou aan om nuwe leidrade op te volg, met pogings wat plaaslik sowel as internasionaal voortduur.
Die polisie vra die publiek om enige inligting te deel en beklemtoon dat alle leidrade opgevolg sal word. Enigiemand met inligting kan die Stop Misdaadlyn by 08600 10111 bel, of van die MySAPS-toep gebruik maak.
