KWAZULU-NATAL. – Die polisie het ‘n soektog na ‘n aantal gewapende verdagtes geloods wat Sondag ‘n juwelierswinkel in Phoenix beroof het, waartydens ‘n polisiebeampte en ‘n lid van die publiek gewond is.
Die polisie sê die verdagtes het die juwelierswinkel in die Phoenix Plaza bestorm en met juwele en geld gevlug. Terwyl die verdagtes in ‘n bakkie van die toneel aan die vlug was, het die trio-taakspan van Phoenix agter hulle aangejaag. Die verdagtes het van die agterkant van die bakkie op die polisielede, wat op hulle hakke was, geskiet. ‘n Oor-en-weer-skietery het ontstaan. Nog twee voertuie met verdagtes het die polisievoertuig van agter genader, waartydens ‘n polisielid in die skouer gewond is.
‘n Lid van die publiek wat langs die pad geloop het, is in die been getref. Een van die verdagte voertuie is verlate in L-seksie in KwaMashu gevind.
Reaction Unit South Africa sê oproepe vir hulp is uit die Plaza en van ‘n GPF-lid ontvang. Reaksiebeamptes wat na die toneel gehaas het, het dadelik onder vuur gekom. Ongeveer 15 swaar gewapende verdagtes in drie voertuie het die Plaza omstreeks 11:10 bestorm. Hulle was met AK47’s, gewere en pistole bewapen. Na die roof het ‘n jaagtog en skietery ontstaan. Buiten ‘n polisielid en ‘n gemeenskapslid wat gewond is, is verskeie voertuie, ‘n polisievoertuig en geboue beskadig. ‘n Veiligheidswag is ook van sy vuurwapen beroof.
Die verdagtes kon daarin slaag om te ontvlug.
Foto: Reaction Unit South Africa
Foto: Reaction Unit South Africa
