OOS-KAAP. – ‘n Juwelierswinkel in ‘n inkopiesentrum in Gqeberha is Maandagmiddag omstreeks 13:50 beroof. Die polisie is op soek na die groep verdagtes.
Kapt. André Beetge sê volgens inligting het ‘n groep van agt tot tien verdagtes die inkopiesentrum binnegegaan en direk na die juwelierswinkel beweeg waar juwele ter waarde van ‘n onbekende bedrag geroof is.
Niemand is tydens die misdaad beseer nie.
Beetge sê nadat die juwelierswinkel geplunder is, het die verdagtes in ‘n bruin/bronskleurige Suzuki met sewe sitplekke en ‘n silwerkleurige Etios van die toneel gevlug.
‘n Dossier van sakeroof is by die Mount Road-polisie geopen. Daar word na die verdagtes gesoek.
Enigiemand met inligting van die sakeroof wat die polisie met die ondersoek kan help, word gevra om kapt. Sithole by 082 457 2812 te bel.
