WES-KAAP. – ‘n Vierjarige seekoeibul van die Valsbaai-natuurreservaat is op 22 Julie in ‘n 17 uur lange operasie na ‘n wildreservaat in Plettenbergbaai verskuif. Die Stad Kaapstad se biodiversiteitsbestuurtak het die verskuiwing suksesvol uitgevoer deur ná maande se beplanning onder meer van ’n vangboma, hyskraan, vragmotor en veeartsenykundige toesig gebruik te maak.
Jason Love van Die Stad Kaapstad sê die hervestiging is luidens ‘n verklaring van die onderburgemeester, Eddie Andrews, uitgevoer om konflik met ander bulle en moontlike verskuiwing na omliggende gemeenskappe te voorkom. “Hierdie soort operasie is riskant, veral as gevolg van die diere se stresvlakke en die fisiese uitdagings van hantering,” het Andrews gesê.
Die seekoei is op die dag van sy verskuiwing omstreeks 16:00 gevang, op ’n vragmotor gelaai om teen 22:45 te vertrek, en het die volgende oggend om 08:30 veilig in Plettenbergbaai aangekom. Hy word tans in ’n afsonderlike dam gemonitor om geleidelik by sy nuwe trop aan te pas. Die Stad het sedert 2015 reeds drie seekoeie suksesvol as deel van volhoubare wildbestuur hervestig.
“Hierdie hervestiging beklemtoon die Stad se toewyding tot biodiversiteitsbewaring en openbare veiligheid,” het Andrews afgesluit.
