WES-KAAP. – Die Stad Kaapstad het besluit om alle kontrakte met die maatskappy Triple C Maintenance and Services te kanselleer nadat die eienaar glo probeer het om die stadsbestuurder om te koop.
Die Stad sê in ‘n verklaring die stap volg op ’n gesamentlike ondersoek deur sy etiek- en forensiese departement en die polisie. As deel van die ondersoek het die stadsbestuurder saam met die polisie in ’n beheerde operasie gewerk, wat uiteindelik tot die inhegtenisneming van die maatskappy se eienaar gelei het. Die kontrakte wat beëindig is, hou hoofsaaklik verband met konstruksiewerk vir die stad, onder meer padinstandhouding, herseëling van paaie en werk aan stormwaterinfrastruktuur.
Die Stad sê die besluit om die kontrakte te kanselleer is geneem teen die agtergrond van die voortgesette ondersoek deur die betrokke owerhede. Volgens die Stad sal korrupsie nie geduld word nie en sal enige poging om amptenare onregmatig te beïnvloed streng hanteer word. Alternatiewe reëlings is intussen ingestel om te verseker dat dienslewering nie onderbreek word nie terwyl die stad prosesse volg om die kontrakte te vervang of na aangewese reserweverskaffers oor te skakel.
Druk hier om meer te lees.
Lees ook hier:
