OOS-KAAP. – Polisielede het tot aksie oorgegaan toe hulle beeldmateriaal op sosiale media van ‘n kleuterseun (4) van Oos-Londen, wat nie ‘n Kersgeskenk gekry het nie, te siene gekry het.
Lt.kol. Siphokazi Mawisa sê Gonubie-polisiebeamptes het besluit om die kind se Kersfees ook spesiaal te maak. Maj.genl. Christopher Wright, die distrikskommissaris, polisiebeamptes van die gebied en eksterne rolspelers wat Helen May, parlementslid, insluit, het op Oujaar tydens ‘n verrassingsbesoek die kleuterseun se huis saam met Kersvader besoek.
“Die opgewondenheid was oor sy hele gesig geskryf toe sy huis genader word. Hy en sy suster het opgewonde uitgehardloop gekom en is deur Kersvader omhels. Dit was ‘n vreugdevolle dag en geskenke is deur Kersvader aan die boetie en sussie gegee.”
Die spesiale groep besoekers aan die gebied het ook aan minderbevoorregte kinders in die gebied kos en klere gegee.
“Die gemeenskap en kinders het die gebaar deur die span baie waardeer. Dit was ‘n onvergeetlike laaste dag van 2024 vir die ouers en kinders van die Gonubie-omgewing.”
