GAUTENG. – ’n Meisieleerling is glo op 20 Oktober fisies deur ‘n seunsleerling by die Christian Progressive College aangerand en mondelings beledig. ’n Video-opname van die voorval is op sosiale media versprei.
Steve Mabona, GDO-woordvoerder, sê in ‘n verklaring die GDO is bekommerd oor die vooval. Die voorval is ten sterkste veroordeel en ’n ondersoek is na die omstandighede van die insident van stapel gestuur. Psigososiale ondersteuning sal aan die slagoffer en alle betrokke leerders gebied word. Volgens die departement sal die skoolbestuur dissiplinêre stappe teen die betrokke leerling instel.
Matome Chiloane, LUR vir GDO, het gesê geweld en geslagsgebaseerde mishandeling het geen plek in die onderwysomgewing nie.
“Dit is totaal onaanvaarbaar dat ’n leerling aan sulke fisieke en verbale mishandeling in ’n skool blootgestel word. Gepaste stappe sal geneem word. Skole moet veilige ruimtes wees waar alle leerders teen enige vorm van geweld of intimidasie beskerm word,” het Chiloane gesê.
