LIMPOPO. – Dr. Yamilet Castaneda (54),’n Kubaanse dokter, het op 23 Oktober in die Thabazimbi-landdroshof voorgekom nadat sy daarvan beskuldig is dat sy medikasie by die Thabazimbi-hospitaal gesteel het.
Kol. Malesela Ledwaba, polisiewoordvoerder, sê die dokter is op waarskuwing vrygelaat en die saak is vir verdere ondersoek tot 28 November uitgestel. Die beweerde diefstal het op 2 September, kort voor 07:00, plaasgevind toe ’n veiligheidsbeampte by die hospitaal se hoofhek tydens ’n roetine-soektog ongemagtigde medikasie in die dokter se besit gevind het. Sy is daarna na haar kantoor geneem waar nog medikasie ontdek is.
Die voorval is by die polisie aangemeld en ná verdere ondersoeke is die dokter op 22 Oktober in hegtenis geneem toe sy van ’n reis na Kuba teruggekeer het. Ledwaba sê die polisie se ondersoek duur voort.
