KWAZULU-NATAL. – Lt.genl. Nhlanhla Mkhwanazi het ‘n ondersoek beveel nadat CCTV-beeldmateriaal aan die lig gekom het van polisielede wat glo Vrydagaand tydens ‘n operasie in Tongaat onverantwoordelik en onprofessioneel opgetree het.
Kol. Robert Netshiunda sê in die video kan gesien word hoe ‘n polisiebeampte ‘n man met sy oop hand klap. Die voorval blyk onuitgelok te wees. ‘n Rukkie later val nog polisiebeamptes dieselfde persoon aan. In die video word die persoon deur ‘n polisiebeampte geskop, wat ook bo-op hom staan.
Mkhwanazi het ‘n volledige verslag oor die voorval beveel, asook stappe teen die beamptes wat die polisie se gedragskode en die grondwet van die land oortree het.
“Polisiebeamptes het ‘n eed afgelê om te beskerm en te dien en as sodanig moet hulle nooit die magte wat by hulle berus, misbruik nie. Gemeenskappe moet veilig wees en voel in die teenwoordigheid van polisiebeamptes en nie bang wees vir dieselfde beamptes wat veronderstel is om hul bron van toevlug te wees nie. Polisie kan slegs met proporsionele, minimum mag vergeld as hulle hulself in enige vorm van aanval bevind.”
Netshiunda sê die provinsiale kommissaris het bygevoeg indien polisiebeamptes verkeerd opgetree het, sal hulle deur interne regstellende maatreëls in die gesig gestaar word.
“Niemand is verhewe bo die wet nie, en dit sluit polisiebeamptes in.”
