KWAZULU-NATAL. – Vyf vermeende rowers is Sondagaand tydens ‘n skietery met die polisie in Lindelani, in Ntuzuma, doodgeskiet.
Kol. Robert Netshiunda sê die polisie het inligting oor ‘n aantal verdagtes wat in twee voertuie reis en ‘n sakeroof in KwaMashu beplan , opgevolg. Die twee voertuie is geparkeer op die hoek van Mdubu- en Melusistraat aangetref. Die verdagtes het na bewering ‘n woordewisseling gehad, waartydens skote geskiet is. Toe die polisie opdaag, het die verdagtes ook op hulle geskiet. Die polisie het teruggeskiet en vier verdagtes op die toneel doodgeskiet. Tydens deursoeking van die gebied is die liggaam van ‘n vyfde verdagte, wat in ‘n poging om te vlug noodlottig gewond is, aangetref. Drie vuurwapens is in die besit van die oorledenes gekry.
Nog twee verdagtes wat tydens die insident skietwonde opgedoen het, is by ‘n hospitaal opgespoor. Die polisie het ‘n soektog na meer verdagtes geloods.
