GAUTENG. – Altesaam 279 594 vuurwapens van alle kalibers is die afgelope ses jaar deur die polisie vernietig, wat toegewyd bly om onwettige vuurwapens op te spoor en permanent te verwyder.
Maj.genl. Nonkululelo Phokane en lt.kol. Amanda van Wyk sê hierdie week is daar onder die toesig van lt.genl. Tebello Mosikili (adjunk- nasionale kommissaris vir polisiëring) 16 049 vuurwapens en vuurwapenonderdele vir die finansiële jaar 2024/2025 in Vanderbijlpark vernietig. Altesaam 12 502 was handwapens, 1 921 gewere, 1 305 haelgewere en 47 kombinasie-vuurwapens.
Die vuurwapens wat vernietig is, is gedurende operasies gekonfiskeer en aan die staat verbeurd verklaar en sluit vuurwapens waarvan kriminele sake reeds afgehandel is en ook vuurwapens wat aan gesinsgeweld en transitorooftogte gekoppel is, in. Sommige van die vuurwapens is tydens ‘n amnestietydperk vrywillig aan die polisie oorhandig.
Van die vernietigde vuurwapens is 4 509 van die Wes-kaap, 4 159 van Gauteng, 3 241 van KwaZulu-Natal, 1 104 van die Oos-Kaap, 1 046 van die Vrystaat, 711 van Limpopo, 461 van Mpumalanga, 459 van Noordwes en 359 van die Noord-Kaap.
Al die vuurwapens met werkende meganismes is aan IBIS-toetsing (geïntegreerde ballistiese identifikasiestelsel), onderwerp om vas te stel of dit moontlik in die uitvoering van misdade gebruik is.
