LIMPOPO. – Die departement van gesondheid in Limpopo het ‘n interne ondersoek van stapel gestuur na aanleiding van ‘n video wat op sosiale media versprei is waarin ‘n moeder beweer dat sy en haar siek kind vir meer as sewe uur sonder hulp by Matlala-hospitaal moes wag.
Kapudi Moagi, die departement se woordvoerder, sê in ‘n verklaring die departement neem sulke bewerings ernstig op, aangesien geen pasiënt aan verlengde wagtye onderwerp behoort te word sonder om gehelp te word nie. Hy het bygevoeg die waardigheid en gesondheid van elke pasiënt is van die uiterste belang en dat enige afwyking van hierdie standaarde onaanvaarbaar is.
Die departement het Maandagoggend, nadat hulle van die video bewus geraak het, onmiddellik ondersoek ingestel om die feite oor die insident vas te stel. Dit sluit in die verifiëring van die presiese datum en tyd van die video, asook die identifikasie van die betrokke individue. Die pasiënt word tans gesoek om die fasiliteit se rekords te vergelyk, die aankomstyd, beweging binne die hospitaal, en enige konsultasies of intervensie vas te stel.
Daarbenewens ondersoek die departement bewerings rakende die afwesigheid van personeel in die area soos in die beeldmateriaal aangedui. Indien enige nalatigheid bevestig word, sal gepaste dissiplinêre stappe volgens die departement se beleid geneem word.
Wat die kwessies oor netheid betref wat in die video uitgelig word, het die departement verduidelik dat die buitepasiënt- en ongevalle-afdeling van die besigste areas in enige hospitaal is en dat daardie areas op ‘n gereelde grondslag skoongemaak word. Spesifieke klagtes in die video word egter nog ondersoek.
“Die departement wil die publiek verseker dat dit daartoe verbind is om alle pasiënte met waardigheid, respek en spoedige sorg te behandel,” het Moagi gesê. Verder word ’n beroep op die publiek gedoen om sulke voorvalle by die bestuur van die fasiliteit of deur die departement se klagtestelsel aan te meld, sodat dit dadelik aangespreek kan word.
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
