KWAZULU-NATAL. – Drie werknemers van McDonalds-restaurant in King Dinuzulustraat in Berea is gistermiddag met ‘n mes aangehou. ‘n Gewese vroulike werknemer (38) is op die toneel in hegtenis geneem.
Lt.kol. Nqobile Gwala sê die polisie moes ‘n skokgranaat gebruik om die slagoffers te bevry. Die verdagte is in hegtenis geneem.
Sy is vir mediese waarneming onder polisiebewaking in die hospitaal.
‘n Saak van ontvoering word ondersoek.
Garrith Jamieson van ALS Paramedics sê verskeie oproepe vir hulp is omstreeks 13:30 ontvang. Met aankoms op die toneel was die SAPD en ander rolspelers reeds teenwoordig en die toneel afgekordon. Paramedici is strategies, weerskante van die gebou, geplaas vir indien enige beserings opgedoen sou word. Die polisie het net voor 16:30 beheer van die toneel oorgeneem. Die verdagte en drie slagoffers is geassesseer en op die toneel behandel voordat hulle vir verdere mediese bystand na ‘n hospitaal vervoer is.
Bronne: SAPD en ALS Paramedics
