GAUTENG. – Nadat ‘n herrie gister by Laerskool Matshidiso in Katlehong uitgebreek en beeldmateriaal daarvan op sosiale media versprei is, is vyf verdagtes deur die polisie in hegtenis geneem.
Beeldmateriaal wys hoe verdagtes onderwysers en leerders gewelddadig by die skool intimideer. ‘n Pastoor en sy veiligheidspersoneel bestorm die laerskool en vat twee kinders met geweld weg.
Kol. Noxolo Kweza sê die verdagtes is gisteraand vir intimidasie en geweld in hegtenis geneem. Tydens die voorval het verdagtes replika-vuurwapens en pangas as afskrikmiddels hanteer. Hulle sal op aanklagte van aanranding, roekelose hantering van ‘n vuurwapen wat lewens en eiendom in gevaar stel, diens as ‘n ongeregistreerde veiligheidsdiens, opsetlike saakbeskadiging en intimidasie in die Palm Ridge-landdroshof verskyn. Een van die verdagtes is in hegtenis geneem nadat die Katlehong-Noord-polisiestasie se stasiebevelvoerder aangerand is toe ‘n groep mense daarop aangedring het om buite die polisiestasie met die pastoor af te reken.
Die polisie het op replika-vuurwapens en pangas beslag gelê.
Lt.genl. Tommy Mthombeni sê meer inhegtenisnemings is nie uitgesluit nie.
Lees ook: KYK: Pastoor en ander verdagtes saai chaos by skool en gryp kinders.
