KWAZULU-NATAL. – ‘n Groep jong verdagtes wat ‘n paar weke gelede op beeldmateriaal vasgevang is waar hulle na ‘n hostel in KwaMashu skiet, verskyn vandag op verskeie aanklagte in die hof.
Kol. Robert Netshiunda sê die jong mans in die video, wat op sosiale media versprei is, verskyn in Hof B van die Ntuzuma-landdroshof.
“Lt.genl. Nhlanhla Mkwhanazi, die provinsiale kommissaris van KwaZulu-Natal, sal by die Ntuzuma-landdroshof teenwoordig wees.”
In die video kan gesien word hoe lukraak na die hostel geskiet word.
Netshiunda sê speurders van KwaMashu se eenheid vir ernstige en geweldsmisdade het die verdagtes met 11 moorde, agt pogings tot moord, twee huisrooftogte en twee gewapende rooftogte in die KwaMashu-area verbind. Hulle word ook aan drie sake van kaping en twee sake van vragmotorkapings op die Dumisani Makhaye-hoofweg verbind.
