NOORDWES. – ‘n Man wat glo Saterdag ‘n saak van beweerde aanranding by die Rustenburg-polisiestasie aanhangig wou maak, is self deur ‘n polisiebeampte wat van diens was, aangerand. Beeldmateriaal van die insident is wyd op sosiale media versprei.
Lt.kol. Sam Tselanyane sê die gedrag van die polisiebeampte word deur die polisiebestuur veroordeel. ‘n Woordewisseling het na bewering tussen die polisiebeampte, nog mense en die man wat in die beeldmateriaal aangerand word, by ‘n haarkapper in ‘n winkelsentrum ontstaan.
Tselanyane sê een van die slagoffers, op sosiale media as Ofentse Raphuti geïdentifiseer, wou ‘n saak by die polisiestasie oopmaak. Die polisiebeampte is ook na die polisiestasie, waar hy glo die man in die parkeerarea aangetref het. Na bewering het die polisiebeampte hom weggejaag en aangerand. ‘n Polisiebeampte wat aan diens was, moes tussenbeide tree om die situasie te kalmeer.
Die polisiebeampte en klaer het oor en weer sake van aanranding teen mekaar oopgemaak. Die insident word ondersoek. Tselanyane sê die gedrag van die polisiebeampte is totaal onaanvaarbaar.
