Video aan einde van die berig
NOORD-KAAP. – ‘n Aanval op ‘n vrouepolisiekonstabel tydens misdaadvoorkomingspligte in die Kimberley-sakegebied is skerp veroordeel. Twee verdagtes is inhegtenis geneem. ‘n Video-opname van die voorval is intussen wyd versprei.
Brig. Mashay Gamieldien, polisiewoordvoerder, sê in ‘n verklaring die video-opname wys hoe die polisiekonstabel tydens die uitvoering van haar pligte aangeval word. Twee verdagtes is deur ander misdaadvoorkomingslede op die toneel in hegtenis geneem. Die verdagtes sal van aanranding op ’n polisiebeampte, verset teen arrestasie, regsverydeling en opsetlike saakbeskadiging aangekla word.
Die polisielid het geringe beserings opgedoen en het mediese behandeling ontvang. Sy word deur die polisie se eenheid vir werknemergesondheid en -welstand (EHW) ontlont en met berading bygestaan.
Lt.genl. Koliswa Otola het die voorval skerp veroordeel en gewaarsku dat die polisie geen geweld teen sy lede sal duld nie. “Niemand is bo die wet verhewe nie. Dié wat ons beamptes aanval, sal deur die volle mag van die wet in die gesig gestaar word. ’n Aanval op ’n polisielid is ’n aanval op die staat.”
