Video-opnames kan onderaan die berig gesien word.
WES-KAAP. – Uiters hoë reënvalle is oor groot dele van die Tuinroete aangeteken, met verskeie gebiede wat uitsonderlike hoeveelhede water ontvang het. Die hoogste lesing, 301,2 mm, is in Joubertina aangeteken. Ander hoë metings sluit in Knysna Kleingrysbos met 286,8 mm, Knysna Diepwalle, met 285,6 mm, gevolg deur Plett Newlands met 276,8 mm, Stormsrivier Forest Fernmet met 239,2 mm en Stormsrivier Witteklip met 222,8 mm.
Die Tuinroete-Distriksmunisipaliteit sê die data bevestig die omvang van die weerstelsel, met reënval wat oor kusdorpe, berggebiede en binnelandse streke uitgesak het. In die George-omgewing is swaar reënval ook gemeet, insluitend Witfontein met 219,2 mm, George Tierkpop met 190,8 mm, George Airport met 150,3 mm, George Waboomskraal met 128,8 mm, George Jonkershoek met 107,6 mm, asook Herold Lovain met 82,8 mm en Rheebok-Sandhoogte met 43,2 mm. Aan die kus- en omliggende gebiede is onder meer Plettenbergbaai met 159,4 mm, Wilderness Dieprivier met166,2 mm, Wilderness-hoogte met 73,4 mm en Mosselbaai, Robinsonpas, met 179,6 mm aangeteken. Ander Mosselbaai-metings sluit in Mosselbaai met 87,2 mm en Mosselbaai Kwepertuin met 1,6 mm. In die binneland is die volgende lesings aangeteken: Oudtshoorn, 79,2 mm, De Rust Std, 123,9 mm, Ladismith, 50,2 mm, Uniondale De Hoop, 138,0 mm, Avontuur Bellevue, 85,0 mm, Avontuur Boskloof, 105,2 mm, Kammanasieberg Vinkrivier, 84,2 mm en Kammanasieberg Vinkrivier, 84,2 mm.
Laer reënval is onder meer in Riversdal, 28,6 mm, Riversdal Grootbos, 49,6 mm, Riversdal Assegaaibosh, 49,4 mm, Suurbraak Lismore, 42,8 mm, Heidelberg Kruisrivier, 24,2 mm, Stilbaai, 18,8 mm en Witsand Westfield, 17,6 mm aangeteken. Die owerhede sê die wydverspreide reënval beklemtoon die erns van die weerstelsel, met voortdurende risiko’s van oorstromings, padsluitings en geïsoleerde gemeenskappe. Inwoners word versoek om waaksaam te bly en om amptelike opdaterings te volg.
Die Mosselbaai-munisipaliteit het Woensdag sy stadsbeplanning en brand- en reddingsdienste en rampbestuur-spanne ontplooi om ’n modderstorting te ondersoek en vas te stel wat tydens swaar reën by ’n ontwikkelingsperseel tussen Menkenkop en Renosterbos in Hartenbosheuwels plaasgevind het. Volgens die munisipaliteit is die gebied tans onder waarneming terwyl strukturele en veiligheidsbeoordelings gedoen word om die omvang van die skade te bepaal. Inwoners word versoek om onnodige reise te vermy en om binnenshuis gedurende die ongunstige weerstoestande te bly, aangesien verdere grondverskuiwings of gevaarlike toestande nie uitgesluit kan word nie.
