Die tweepot-aftreestelsel is deur die regering as wet geteken en sal op 1 September in werking tree.
Die publiek word met inligting van finansiële instellings oorval. Maar verstaan jy na jare waarvoor jy jou afgesloof het en wat met jou swaarverdiende geld na jou aftrede gaan gebeur?
Old Mutual verduidelik in ‘n Afrikaanse video hier bo hoe die stelsel jou en jou sak gaan raak. Jy gaan steeds soos sake nou staan jou gevestigde pot (pensioenspaargeld) hê, maar jy gaan nou outomaties ‘n addisionele spaarpot hê. In jou pensioenpot (bewaarpot) sal twee derdes van jou geld wees en in jou spaarpot een derde van jou geld.
“Met die spaarpot beteken dit jy kan dalk in aanmerking kom om geld te laat oorplaas van jou bestaande gevestigde pot (jou huidige pensioenspaargeld) na jou nuwe spaarpot.”
Jy kan een keer in ‘n belastingjaar ‘n minimum van R2 000 uit jou spaarpot onttrek, maar jy sal ‘n transaksiefooi, asook belasting, gebaseer op jou marginale belastingkoers, daarvoor betaal.
“Alhoewel dit uiters aanloklik kan wees om toegang te verkry tot die geld wat tot jou beskikking is, onthou die langtermynvoordele om nie te onttrek nie, sal jou in die toekoms baat.”
Old Mutual waarsku dit is om spaar vir jou aftrede te bevorder. Die spaarpot sal met aftrede aan jou uitbetaal word, maar die pensioenpot sal ‘n maandelikse inkomste voorsien.
Bron: Old Mutual
