KWAZULU-NATAL. – Vier verdagtes is Vrydag in Woodlands, Montclair, suid van Durban, tydens ‘n skietery met die polisie dood. Die mans word aan verskeie rooftogte in die eThekwini-distrik, insluitend die roof van ’n juwelierswinkel in Tongaat op 15 Januarie, verbind. Die voorval het reg langs Laerskool Woodlands plaasgevind.
Luidens ‘n verklaring van kol. Robert Netshiunda het die polisie die verdagtes by ’n private woning in Glanvilleweg opgespoor, waarna ‘n skietery uitgebreek het. Vier verdagtes is doodgeskiet en sewe ander is met beserings in hegtenis geneem en onder polisiebewaking in ‘n hospitaal opgeneem. Die beseerde verdagtes sal in die hof verskyn wanneer hulle medies geskik is.
Die polisie het op drie vuurwapens beslag gelê. Daar word na minstens nog vyf verdagtes wat weggekom het, gesoek.
Garrith Jamieson van ALS Paramedics sê dié diens was op die toneel by Stanbridge Crescent teenwoordig waar die beseerdes behandel is.
