Video-opname in berig.
MPUMALANGA. – ‘n Krokodil van 3.57 m lank is Maandagaand op die hokkieveld van Hoërskool Ben Viljoen in Groblersdal gevang.
‘n Video-opname van die voorval is aan Nuusflits gestuur waarin gehoor kan word hoe kwaai die krokodil blaas en rol, terwyl daar gestoei word om haar veilig te vang.
Die skool sê in ‘n sosialemediaplasing mnr. John Smith, die skoolhoof, moes homself Steve Irwin hou toe ‘n veiligheidswag van Gunmar, wat omstreeks 20:30 sy rondtes doen, op die wyfiekrokodil afgekom het.
Die veiligheidswag wat sy professie gestand doen, het dadelik bystand ontbied, waarna sy maatskappy vir Hannes Botha, ‘n herpetofauna-wetenskaplike van die Mpumalanga Toerisme en Parke Agentskap (MTPA) gekontak het. Die MTPA is lid van die Internasionale Unie vir Natuurbewaring (IUCN) en Spesie-oorlewingskommissie (SSC) Krokodilspesialisgroep. Botha, die skoolhoof, skoolpersoneel en veiligheidsmaatskappypersoneel het almal saamgespan om die krokodil van die skoolperseel weg te kry.
Die krokodil is deur Botha ondersoek en deur 10 mans op ‘n bakkie probeer laai, maar dit was te groot. ‘n Groter bakkie moes ingespan word. Die krokodil is langs die N11-Middelburgpad, buite Groblersdal, by ‘n rivier losgelaat.
