OOS-KAAP. – Donovan Chadon Rossouw (21) is vir die moord en roof van die 69-jarige Anna Magrieta Gouws van Jeffreysbaai tot effektief 18 jaar tronkstraf gevonnis .
Luxolo Tyali, NVG-woordvoerder, sê Rossouw is in die Gqeberha-hooggeregshof tot 18 jaar vir moord en 15 jaar vir roof met verswarende omstandighede gevonnis. Die vonnisse is samelopend. Rossouw is die derde en laaste beskuldigde wat vir die misdaad gevonnis is. Sy medebeskuldigdes, Riaan Ridley Umslana (21) en Siyabulela Madolo (22), is in Februarie vanjaar tot onderskeidelik 25 en 18 jaar effektiewe gevangenisstraf gevonnis.
Volgens Rossouw se pleitverduideliking het die drie mans Gouws op 27 April 2022 genader en vir ’n saamrygeleentheid gevra. Sy het ingestem en selfs by ’n KFC gestop om kos vir haarself en die drie mans te koop. Terwyl hulle onderweg was, het Madolo glo genoem dat Gouws ’n groot bedrag geld in haar handsak het. Umslana het daarna glo ’n vuurwapen uitgehaal en haar beursie en bankkaarte geëis. Toe Gouws weier en probeer het om weg te ry, het Umslana glo die sleutels uit die aansitter verwyder. Hy het haar daarna geskiet. Die mans het volgens Rossouw haar besittings geroof en later van die gesteelde goedere gedeel.
Rossouw het die aanklagte ingevolge ’n pleit-en-vonnisooreenkoms teen hom aanvaar. Die NVG het die vonnis verwelkom en gesê die saak toon dat persone wat aan ernstige geweldsmisdaad deelneem, aanspreeklik gehou kan word, selfs al het hulle nie self die doodskoot geskiet nie.
