GAUTENG. – Letitia van den Berg, wat haar as ’n maatskaplike werker met ’n spesialisgebied in aannemings voorgedoen het en na bewering talle kinderlose paartjies bedrieg het, is Sondagaand 11 Oktober oorlede voordat die hof Maandag uitspraak in haar bedrogsaak kon lewer. Haar doodsertifikaat is vanoggend (Vrydag) by die Pretoriase Hooggeregshof ingedien, waarna die saak van die rol geskrap is. AfriForum se privaatvervolgingseenheid het vyf van die slagoffers – Sonia Leithgöb, Kimberley Kruger, Erica Franks, Shannon Staniforth en Sandra Pretorius – deur die regsproses ondersteun.
Barry Bateman, woordvoerder van AfriForum se privaatvervolgingseenheid, sê die eenheid het betrokke geraak nadat die staat volgens hom nie voldoende ondersteuning aan die slagoffers gebied het nie. Van den Berg het voornemende aanneemouers na bewering geld gevra vir aannemings wat nooit sou plaasvind nie. In sommige gevalle is babas glo aan paartjies voorgehou sonder dat die biologiese moeders tot aanneming ingestem het. Sy het volgens die verklaring selfs sonar-skanderings gestuur en geld vir beweerde hospitaalrekeninge gevra, voordat sy later beweer het dat die babas se biologiese moeders miskrame gehad of gesterf het. Die beweerde bedrog strek volgens AfriForum terug tot 2014. Sommige paartjies het babakamers ingerig en benodigdhede gekoop vir kinders wat nooit by hulle tuisgekom het nie.
Pretorius sê die afsterwe van Van den Berg het die slagoffers die geleentheid ontneem om ’n uitspraak te hoor en die afsluiting te kry waarop hulle gehoop het. Sy het gesê sy wou hoor dat Van den Berg skuldig bevind en gevonnis word vir wat aan hulle gedoen is. Staniforth, wat sê haar familie leef al vier en ’n half jaar met die gevolge saam, vertel dat hulle babakamers voorberei en oor babas gerou het wat hulle geglo het gesterf het. Sy sê hulle wou hê die hof moes hul lyding erken. Bateman sê die eenheid sal voortgaan om slagoffers te ondersteun wat volgens hom deur instellings in die steek gelaat word.
