GAUTENG. – Karabo Magomani Maluleke (21) was ‘n derdejaarstudent toe sy vermis geraak het. Haar liggaam is onherkenbaar verbrand in die Krugersdorp-area gevind. Tinyiko Baloyi (41) is lewenslank en nog 10 jaar vir haar moord tronk toe gestuur.
Phindi Mjonondwane, woordvoerder vir die NVG, sê Maluleke is op 27 Mei 2023 laas gesien. Baloyi is die volgende maand op aanklagte van ontvoering en moord in hegtenis geneem.
Maluleke was ‘n sielkunde-student by die Noordwes-Universiteit in Potchefstroom. Haar liggaam is kort na Baloyi se inhegtenisname gevind en deur DNS-toetsing geïdentifiseer. Baloyi is deur die Johannesburg-hooggeregshof skuldig bevind en gevonnis.
Mjonondwane sê Baloyi het Maluleke op die betrokke dag ontvoer omdat hy vermoed het sy het ‘n ander verhouding. Hy het haar vir drie dae in ‘n gastehuis in Roodepoort gevange gehou. Haar familie kon haar nie in die hande kry nie en het haar as vermis aangemeld. Op 30 Mei het Baloyi vir Maluleke na ‘n oop veld in Doornkop geneem, haar hande en voete vasgebind, haar met petrol deurdrenk en aan die brand gesteek. Haar onherkenbare liggaam is vyf dae later gevind.
AO Rabed Zwana het Baloyi se bewegings met ‘n gehuurde motor vasgestel. Hy het sy selfoon verkoop om met ‘n taxi na Giyani in Limpopo te probeer vlug, waar hy in hegtenis geneem is.
Baloyi het skuldig gepleit, waarna hy gevonnis is. Hy het Maluleke se familie om verskoning gevra.
