MPUMALANGA. – Freddy Msiza (39), ‘n munisipale lewensredder van Steve Tshwete-munisipaliteit in Middelburg, het Saterdagmiddag sy lewe verloor toe hy ‘n tienerseun (15) in die Kees Taljaard-swembad wou red.
Sibusiso Chauke, waarnemende woordvoerder vir die munisipaliteit, sê Msiza se afsterwe is ‘n groot verlies vir die munisipaliteit. Die omstandighede van die insident word ondersoek en sal mettertyd beskikbaar gestel word.
Die swembad is intussen tydelik gesluit en sal weer Maandag geopen word. Inwoners wat die swembad gebruik, word gemaan om meer waaksaam oor veiligheidsmaatreëls te wees en wenke wat op kennisgewingborde verskyn, ter harte te neem.
Dr. Elizabeth Shabalala, die waarnemende munisipale bestuurder, het medelye met Msiza se familie en vriende uitgespreek. Begrafnisreëlings sal binnekort beskikbaar wees.
