KWAZULU-NATAL. – Die liggaam van ’n vragmotorbestuurder is Sondagoggend gevind nadat sy vragmotor Saterdagoggend ongeveer 100 m in Dududu aan die Suidkus teen ’n steil wal af is.
Volgens Samantha Meyrick van IPSS Medical Rescue het die vragmotor tot stilstand gekom danksy twee bome wat dit gestuit het. Paramedici het bevestig die vragmotorbestuurder het gesterf. Weens die steil afgrond, digte bosse en onstabiliteit van die vragmotor kon Ugu-brandweer nie die liggaam na die padoppervlak bring nie. Saterdagmiddag het IPSS Search & Rescue, saam met die SAPD se soek-en-reddingseenheid, die brandweer se bevindinge bevestig. ’n Reddingslid het na die wrak afgegaan om die situasie te evalueer.
Meyrick sê daar is besluit om Sondagoggend met meer spanlede na die toneel terug te keer om die vragmotor te stabiliseer en van die digte bosse weg te sny. Die gesamentlike span, bestaande uit IPSS Medical Rescue, die Suid-Afrikaanse Polisiediens (SAPD) en Durban-metropolisie, het verskeie ure lank saamgewerk om toegang tot die liggaam te kry. Nadat die vragmotor gestabiliseer is, is die liggaam suksesvol verwyder en aan die polisie oorhandig. Die polisie het bevestig dat die ongeluk ondersoek word.
“Dit was ’n massiewe poging, geïsoleerd en onder uiters moeilike omstandighede,” het Meyrick gesê. “Verskeie agentskappe het saamgekom om hierdie moeilike operasie suksesvol af te handel.”
Die oorsaak van die ongeluk is nog onbekend, en die ondersoek duur voort.
